Nung Niyeṣ̌ Guyboz, Šoh Gʉl Azize Amonat Kert

Nung Niyeṣ̌ Guyboz, Šoh Gʉl Azize Amonat Kert

Gulmit, Yezi Gojale Ala Nambardar Šohgʉl Azize dǝ xʉ diyor Gulmit amonat kert. Yave ʉmr Cǝbʉr Wiste Haten sǝk sar tu. Dǝ marhume nǝmoze jǝnozaev cǝ Gʉlmiten bišxa ird girde diyorven maxluqe širkat kert.

Ala Nambardar Šohgʉl Aziz dǝ Geelt Baltiston jǝgunet nizaboziyen yi nung niyeṣ̌k guyboz tu. Yowe xʉ ʉmre Cǝbʉr Wist sol dǝ guyboziyen remet. Marhum dǝ Nardran Skout, Gilgit Skout, PWD, woz polise makmahe jʉgune ṭeam yi nung niyeṣ̌k guyboze haysiyaten šomil werex̌tu woz dǝ Šandur, dǝ Čitror, dǝ Lahore lu lup muqobilavi x̌ʉ makmaye nung nix̌itu.

Dǝ sol 1992 yi guybozier Xʉδoyor x̌at x̌e dǝ diyor jamati, siyosi woz sǝmaji yarkviri x̌ʉ hʉnar woz waxt waqf kert. Marhume xizmat dǝ jamati idarave, dǝ taleeme meydon, dǝ sihate meydon, dǝ sǝqofate meydon, dǝ guyboziye meydon ce digarven tǝr pʉrʉt werɣ̌ne. Marhoom the Gulmit Educational and Social Welfare Society ye sadar be werɣ̌ne woz dame waxt Al Amyn Moḍel Skul be qoyim vite.

Marhoom har marka woz mehfile zeeb wo zinat tu woz camen baɣereṣ̌ marka ne zavde. Marhumer sǝk iloqahe torix woz rasmu riwoj, Mire waxte qonunen qiti qiti hʉkmate waxte qonun ʒi baf puxtagi hosil tu, woz har yiweṣ̌ can rehnumoyi deẓ̌d. Gojale nambardare heysiyaten yowe šilda woz qǝsaeṣ̌ yi sanade hysiyat lekert. Cem khulčizen niyeṣ̌ yo yi baf ramdil, dustdor, dona woz sǝk qowm nang x̌ak kʉzg yi inson tu.

About author

admin

gulmitwala@gmail.com