Dǝ Gulmit Bʉlbʉlike zere ehtimom sǝk X̌ik sǝqofat woz zǝbon dǝ nǝw jǝwonve mulung taqiqe riwoj rǝδo hatenev yi tarbiyate intizom kert. Hademev sǝk bunyoδi taqiqe tariqaye koren qiti qiti dǝ X̌ik wor nivišne bobatev be dǝ jǝwonven nišast lekert. Yem nišaste sarkardagi nazir Ahmad Bʉlbʉl woz Didor Ali ye kert woz 20 qirib mirdina woz ojiz jǝwonve dem širkat kert. Yeme yi maqsad dǝ yez wuδg COVID 19 holot jǝwonve dǝ tamiri yarken mušxʉl lǝcern woz yaver yem bowar be x̌ak tu ki X̌ik rasm wo riwoj woz ziki taqiq korver yi lup xǝzona pinhon. Niveṣ̌ hǝyem jǝwoništ sǝk muxtalif mozu bunyodi taqiqe yark tǝr pʉrʉt yunden. Sǝk kum mozuvep ki yark wost yaštev hayem zel:

  1. X̌ikwor Xun
  2. Dorʉwer Istimol Wocne ya Wuṣ̌ Wuṣ̌ogišt
  3. X̌ikwor Ṣ̌itik/Guyboziyišt
  4. X̌ikwor Tuye Rasm
  5. Xǝδorg
  6. X̌ikwor Ṣ̌unge Nǝqškorie Yark
  7. X̌ikwor Skiδ woz Beṭe Čikan Yark
  8. Qidime Bimoriɣ̌ woz yave Iloj

Cemen bišxaev be sǝk digar mozuve be yark wost. Bʉlbʉlike intizomya dǝ Gulmit Social Welfare & Educational Society ye dest yam taqiqi yarkvep yi kitobča sʉrater dǝ xalgvep ɣ̌atʉvd.

Yem tarbiyati tilwisa dem mʉye 9 torix tǝr yand niyeṣ̌te woz jǝwon taqiq kor yoy sǝma girve x̌ʉ yark piš kert.

Yeme bobat tǝr pʉrʉt joyne hat tayinit.

https://www.facebook.com/bulbulik/posts/974407852985886

Leave a Reply

Your email address will not be published. Required fields are marked *