Noor Pamiri
Cʉmr xʉšrʉyi de xalge pʉzʉv hayem xayol drek wocen ki kʉyeṣ̌ tow xuṣ̌ cart woz sketoweṣ̌ tirin cart. Har yiweṣ̌ zeng bakhtdor wosta naey yemeṣ̌ yiγ̌un khalger nisib wost?
Kay yezi qəsa saver carem. Dʉrʉst dar fikrem tʉ ki yi bičarč šmol taγ̌da x̌e ẓ̌ʉ khayoli pe hazor γ̌əna werkhovd. Kʉmrem savzahet sepreγ̌ wind, woz kʉmer livorčet qoqiγ.
X̌atem ki da svaza mʉlʉng halem. Sepreγ̌ vʉl carem woz de čilmindaket wingasen qisa carem. X̌ʉ dard yaver x̌anem, yawa xʉšiγ̌ camven kʉṣ̌ʉyem. Da pomirem x̌at bond x̌e ta savz osmonem dʉroz tayin. Cem pʉren rex̌k ta pʉr batken nay kʉmer witiš tʉ, nay woz čiz digar tapin jondonr pidoγ̌ tʉ. Pʉzʉv het vitay. Khʉšrʉyiγ̌ jodʉw-a rang ska ẓ̌ʉ wajʉd sawor vitay. Pe x̌atem nay werγ̌nay. Hʉš badal vitay. Ẓ̌ʉ pʉzʉva rimrim tiz ske wocen vitay. Maẓ̌er hazeng sʉdhoyde ki ẓ̌ʉ pʉzʉveṣ̌ demaẓ̌en čiz qisa x̌ak zoq cart.
Maẓ̌ x̌at ki ye širin pʉzʉv, zeng ret pʉz dest x̌at mʉš x̌e demaẓ̌en qisa may car. Čizet ki x̌enaker tey trem baar niwiz. Yow kandi x̌e x̌ati, “tra bar cereng nivzem. Wʉzep tra merim”. Maẓ̌ yor pʉzʉv vast. X̌atem ki weṣ̌ay may. Yemi xayolet fikr woz eynotay dʉnyo. Dremeṣ̌ heč kʉy nay mirit. Zax̌ik himmat car. Trem bar niwiz.
Ẓ̌ʉ pʉzʉv x̌at pirišon x̌etʉ. X̌ati ki zengep tra baar nay nivzem. Wʉzem birač̣. De x̌ʉ sokhtnem ki tra bar niyeṣ̌te tʉwep maẓ̌ xʉṣ̌ nay car. Maẓ̌ yor x̌at ki ye bafay pʉzʉv. Tʉ bor de jida pist x̌at di x̌e trem bar niwiz. Zax̌ikem sʉmba kert x̌e x̌atem ki zeng bor gowa ki de čilmindaka pist x̌at di x̌e trem bar wezay. Yow woz x̌at pirišon gox̌t. Persti, “Da čilmindaka pistem ki x̌at di x̌e yandip woz da x̌ʉ qolib čeremen bas wezma nay?”. Maẓ̌ yor yʉlm dhet, x̌atem ki de fikr, eynot woz xayola dʉnyoweṣ̌ kulčiz wost. Himat ki vitay har čizeṣ̌ wost.
Γ̌arč aparsiγ̌ woz jawob sawolen cebas ẓ̌ʉ pʉzʉv de čilmindaka pist x̌at dix̌t x̌e tra bar niyeṣ̌ta. Cʉmer xʉšrʉyeṣ̌ sʉdoyda. Ziminet osmona savziγ̌ dam tap tʉ, woz tra mʉlʉng mʉlʉng zart nrew rang čʉrgišt be jaay jaay tʉ. Tapeṣ̌ ki dix̌t sitoray sadoweṣ̌ niyeṣ̌ta. Damay hʉsnem aks hairon werγ̌na.
Lafziṣ̌tev zaxik waxter šov vita. Heč čiz sado ce kʉm γ̌enahen nay wezday. Ya čilmindak ẓ̌ʉ pʉzʉv vitu woz ẓ̌ʉ pʉzʉv ya čilmindak vitʉ.
Yi mahalrem didiγ̌d ki ẓ̌ʉ fikre jingali woz obod vitk. Yi ajab šʉr gestʉ. Lafzištev de limanen mʉqabilaher tʉ. Har yiweṣ̌ ẓ̌ʉ aqle icovd ki wʉz yoway istimol carem. Ta x̌ʉ γ̌aṣ̌en ceng yoway nʉng dʉrzem. Ṣ̌ʉrveṣ̌ γ̌afč kert, magam maẓ̌er sʉdoyda ki ya lafziṣ̌tev ca x̌ʉ matlaben ogo tʉ, yaštev ca x̌ʉ toben bač̣ik nay tʉ. Zax̌ikev wʉṣ̌etʉ be bet, albat. Yaver malʉm vitʉ ki damvi tʉmer tob nast ki da čilmandaka pist ya ẓ̌ʉ puẓ̌uvay khʉšrʉyiγ̌ bayon x̌ak bas wezin. Magam zʉriγ̌veṣ̌ γ̌afč kert.
Ce yi polčen yi lafz tre pʉrʉt wezday. X̌ati mareṣ̌ “bi-nʉqs” x̌anen. Wʉzeṣ̌ yem čilmindaka hʉsn bayon x̌ak bas wezim. Caγ̌enahen yi jida lafz gezda, x̌ati maẓ̌reṣ̌ “Gʉlob” x̌anen. Wʉzem yi khʉṣ̌rʉy sepreγ̌a nʉng be taey. De maẓ̌i matlab woz asar. Maẓ̌eṣ̌ pʉtʉn dunyoway šoir woz nivišen kʉzgišt x̌ʉ khʉṣ̌kerdahay taarif bayon x̌aker istimol caren.
Yi lafz ce jida γ̌enahen gezda. X̌ati, wʉzem sitor. Da ẓ̌ʉ voineṣ̌ pʉtʉn dʉnyo hairon wereṣ̌t. Wʉzeṣ̌ ki da naw osmon cerakhem de zamineṣ̌ voin wost. Wʉzem bʉlandi woz khʉšrʉyiγ̌a niṣ̌ʉn. Wuzeṣ̌ ti pʉzʉva hʉsn bayon x̌ak bas wezim. Yi jida γ̌enahen sado wezday ki mareṣ̌ “Gʉl-e-ambar” x̌anen. Wʉzem jay jay de khuva saar. Ca x̌ʉ hʉsnnem wʉz khabar, woz ske maaẓ̌i har yiway nazar.
Ẓ̌ʉ aqal be tayin kert ki lavziṣ̌tev x̌at wʉṣ̌etk. Γ̌afč wakht reγ̌tʉ. Ẓ̌ʉ aql e maẓ̌ tayin kert x̌e kanda.