Dǝ Aliabod, Kʉnjʉδ Wakhi Language Forum, X̌ik Zǝbone qǝlamkor woz sohebe adabve yi maraka, vite. Hadem marakaev sǝk X̌ikwor zike rasmulxat, qǝlamkoriye andoz woz yem zike tǝr pʉrʉt yondake hat yi idorahe bobatev ki kum uburi kameṭev dǝ Passu qoyum x̌etu, yave x̌ʉ yark dǝ marakahe pʉrʉt piš kert. Sǝkem kameṭiye gʉrdanev bu yarke zimidori kǝṭetu. Awal yem ki yaštep yi idorahe soxt wo tarteeb tajwiz caren, duwʉm yem ki yaštep X̌ikwor nivišne muxtalif andoz woz rasmulxate yi tǝqobili joyza tiyor caren.
Hadem muqa Al Waiz Nasir Karim, kumdi ubori kameṭiye sar tu mehmonviri ya marakahe maqsade bobat qǝsa kert. Cen cǝbas Karim Xon Saka dǝ hukmate Geelt Baltistone Nisob Committeeye lupen vitk muloqote bobat serk cǝ meren ogohiyi δet.
Aejaz Karime sǝk royij X̌ik wor rasmulxat yi piškori kert woz hayem waxteṣ̌ ki X̌ik qǝlamkorišt kum tariqen nivšǝna hayavni yi tekniki joyiza piš kert. Yowe X̌ikwor rasmulxat sǝk Kǝmpuṭer woz digar barqi somonve č̣ʉwvʉke bobat yi jǝayza δet.
Karim Ulla Xone sǝk Čine sarkore X̌ik sǝqofat woz zik tǝr pʉrʉt yundake tilwisayi ɣa serk cǝ meren qǝsa kert woz tarev ki kum rasmulxat ijro x̌etk yowi da maraka piš kert.
Can cǝbas Fazal Amin Bege, kumde ki sǝk X̌ikwor zik ɣa serk cǝ meren yark x̌etk x̌ʉ nuqtaye nǝzari piš kert. Woz yowe dǝ majlise pʉrʉt Prof. Dr. Boɣ Šohe tarteeb δetk haya rasmulxate wǝkolati kert.
Camven bišxa Aejaz Karim woz X̌ik qǝlamkorve hat yi mujawiza Marakahe soxt yi piškori δet. Oxir rev maraka qoliber kart woz jay jaynev numoyindave intixob kert. Hadem marakaep har yi qǝlamkor woz sǝk X̌ikwor zik yark x̌ak kuzg, ya čiz be sʉraten hʉmuyt, yi korinda hesyaten šomilep wost. Alwaiz Nosir Karimev he markahe lup deẓ̌d. Yower δast rǝṣ̌ʉvne hatev har diyoren buy buy madad korve intixobev be kert.
Hayem marakarev yem zimidori be δet ki yašt sǝk X̌ikwor zike tarze qǝlamkori woz rasmulxat be yark caren woz dǝ waxten qiti tuke qobil haya rasmulxat woz andoze qǝlamkoriye intixob caren.
Dǝ yod wereṣ̌t ki yem waxteṣ̌ X̌ik qǝlamkorišt Roman, APA, Englišize woz Arabi yoy Forsi andozen x̌ʉ yarkve nivšen. Skayi hayem ɣa lozim ki yi raxt tarze qǝlamkori ki vite sohibe qǝlamištep x̌ʉ yarke yi xʉšrʉy andozen tǝr pʉrʉt yonden.
Hadem karakaev ce Gojale har diyoren bišxa cǝ Ṣ̌iqamanen woz cǝ Bruɣalen be X̌ikve numoyindagi tu.
Yeme bobat Mazid Joiyit…