Lisoniyote mohirišteṣ̌ X̌ikwor zike dǝ Pomiri zikve qǝtor ẓ̌ʉmʉren. Yave mutobiq yem ziki Ironi zikve Indo-European zike xondonen woz dǝ YidƔa, Munji, Iškošimi woz ŠʉƔni zikve meṣ̌I marbut. Magam yez wuδge jaded taqiq korišteṣ̌ skem sǝwolvev sǝk wuč x̌ak vitk woz yavni yem xǝyol ki X̌ikwor zǝbone taluqi dǝ Pomiriyen kam, yoy ne wocne brobari. Zǝbone adabe mutobiq qǝriban Hʉb muxtalif pǝr lǝman pewast andozneṣ̌ yem zike x̌anen. Gojal, Ṣ̌iqaman, Darkut, BroƔal, Woxon, woz Dǝfdore X̌ikvini maxsus andos. Can bǝšxayi dem har yi andoze mulungi be xeli faq, yeme misili Gojale diyor diyorve, xʉsusan Šingšale andoz woz digar diyorve andoze, mulung farqi qobile zikǝr.
Aqwome Mutahida-e idora, UNESCO we mutobiq wuzayne wist soliri X̌ikwor zik pǝ nǝṣ̌ak. Go ki har jaye X̌ikišteṣ̌ dǝ lǝmanen X̌ikwor qǝsa caren magam kum jayi ki yave obodiƔ̌ cǝ digar kam draeṣ̌ yašt ya aksaryate zǝbon dišn woz kǝlom x̌akeṣ̌ tǝr pʉrʉt kaṭen. Hayeme wajani hǝda iloqave X̌ikwor zik pǝr nǝṣ̌ak. Yeme misoli, dǝ Tojikistone aksar jayve X̌ikve mulung ŠuƔni zǝbon; de Ṣ̌iqamanen damve mulung Kuhwor woz dǝ Čeenen damve mulung Siriqoli zike istimol tey. Can bišxa har cʉbʉr mulke qomi woz iloqoyi lup zǝbonve be sǝk X̌ikwor Ɣa asar kǝṭetk. Ṣ̌eƔ̌d nasleṣ̌ yi sathi X̌ikwor dišt woz camven ziyoteṣ̌ tag ne dišen. Hǝyem rǝweṣ̌ X̌ikwor pǝ nǝṣ̌ak x̌etk.
X̌ikwori yi zǝboni zik wurex̌ woz yemev Ɣal batken yi tehriri zǝbone šakǝl rǝδowe bas ne wezg. Taqiq koret zǝbon donven qiti qiti adaben xuṣ̌iƔ̌ lecern kʉzg X̌ik qǝlamkorve x̌ʉ baz wezgung kušiš x̌etk woz muxtalif andoznev yem zike zǝbte tehrirer wuzmetk. Har cʉbʉr mulke qǝlamkorve ya mʉlke qomi andozrev X̌ikwor nivšetk. Hayem wajayi ki Tojikistonev Sirilik andoz; dǝ Pokiston Peršo Arabic; dǝ AfƔonistonev Dari woz dǝ Čeenev Xǝtoye zike andozen sǝk X̌ikwor yark x̌etk. Can bišxa beynul aqwomi zǝbondonve Laṭino Greek yoy Roman andoznev X̌ikwor nivšetk. Woz yem andozi ziyot maqbul čizer ki yave yarki sǝk zǝbon doniye ilm vǝrvsetk. Yez wuδgeṣ̌ Engliše andozen be nivišne yarke oƔozi vitk.